10 красавіка ў рамках двухбаковага супрацоўніцтва інфармацыйны патэнцыял бібліятэкі вывучалі грамадзяне Кітайскай Народнай Рэспублікі, магістранты факультэта журналістыкі Беларускага дзяржаўнага ўніверсітэта.
Добрай традыцыяй стала вывучэнне традыцыйных і электронных рэсурсаў і сэрвісаў нашай бібліятэкі групамі магістрантаў спецыяльнасці “Медыя. Камунікацыі” БДУ. Упершыню прэзентацыя інфармацыйных рэсурсаў і трэнінг праходзілі на кітайскай мове пры ўдзеле Сунь Хаажаня, які перакладаў словы супрацоўніка на кітайскую мову. Заняткі на кітайскай мове характарызаваліся вялікай цікавасцю да патэнцыялу Нацыянальнай бібліятэкі. Нашы сябры з Паднябеснай актыўна задавалі пытанні і атрымлівалі на іх адказы на роднай мове.
Увазе даследчыкаў былі прапанаваны магчымасці рэгістрацыі на партале і платформах закупляемых рэсурсаў для аддаленага заказу друкаваных дакументаў і чытання электронных анлайн, падбору і рэдагавання спісаў літаратуры да навуковых прац, індэксавання дакументаў, аддаленай дастаўкі лічбавых копій фрагментаў дакументаў. У зале дысертацый грамадзяне Кітая актыўна цікавіліся дысертацыямі, якія захоўваюцца на правах рукапісаў і тэрмінамі праверкі тэкстаў на наяўнасць запазычанняў у сістэмах “Антыплагіят” і “ПлагіятКантроль”.
Падчас трэнінгу магістранты асвоілі алгарытмы пошуку навуковай інфармацыі на англійскай і кітайскай мовах па тэорыі камунікацыі і журналістыкі, метадалогіі ў сучаснай камунікатывістыцы, практыцы правядзення інтэрв’ю. Асаблівай папулярнасцю ў кітайцаў карыстаюцца платформы з інтэрфейсам на кітайскай і англійскай мовах, друкаваныя крыніцы на англійскай мове з фонду бібліятэкі.
Нашы сябры запісаліся ў Нацыянальную бібліятэку Беларусі і асвойвалі інфармацыйную прастору, атрымліваючы адказы на пытанні важныя для чытача: дзе атрымаць заказаную літаратуру? дзе ўзяць кнігі без заказу? дзе ксеракапіраваць патрэбныя фрагменты дакументаў? у якіх выпадках спатрэбіцца картачны каталог дакументаў на замежных мовах? у якой зале чытачы запаўняюць бланкі заказу кніг, якія пасля дастаўляюць для іх з тэрыторыі іншай дзяржавы? у якой чытальнай зале можна заказаць складанне спісу літаратуры па тэме да навуковай працы, папрацаваць з даведачнай літаратурай і статыстычнымі зборнікамі? у якой бясплатнай віртуальнай даведачнай службе можна заказаць тэматычны спіс літаратуры па журналістыцы і развіццю камунікацый у Беларусі на англійскай мове? у якіх навуковых рэсурсах адкрытага доступу знайсці матэрыялы на кітайскай на англійскай мовах?
Адукацыйнае мерапрыемства скончылася наведваннем бібліятэчных выстаў. Вялікае ўражанне на будучых журналістаў зрабіла выстава агітацыйнага плаката “Мова ваеннай ілюстрацыі” (баявыя і партрэтныя замалёўкі, кнігі кішэннага фармату для фронту, сатырычныя ілюстрацыі), прысвечаная 80-годдзю Вялікай Перамогі. Нашы сябры са шчырым спачуваннем успрынялі інфармацыю аб трагедыі беларускага народа ў гады Вялікай Айчыннай вайны.
У галерэі “Лабірынт”, пасля агляду работ традыцыйнага кітайскага і карэйскага мастацтва “Жамчужыны Усходу”, Сунь Суцюань выканала на фартэпіяна музычны твор Лі Гу І “Я і мая краіна” пад бурныя апладысменты слухачоў. На выставе, прымеркаванай да 70-годдзя Беларускага геаграфічнага таварыства і 90-годдзя факультэта геаграфіі і геаінфарматыкі БДУ “Ад Нёмана да Ціхага акіяна: гісторыя падарожжаў і геаграфічных даследаванняў” вялікую цікавасць выклікалі геадэзічнае абсталяванне з калекцыі Віктара Вексіна, рэдкія кнігі, карты і эстампы XIX стагоддзя. Магістранты прыйшлі ў захапленне ад друкаванага станка XVI ст. і задавалі шмат пытанняў пра беларускага першадрукара.
Фонды Нацыянальнай бібліятэкі Беларусі спрыяюць фарміраванню ведаў, уменняў і навыкаў пісьменнага вывучэння медыя прасторы, падрыхтоўкі якасных інфармацыйных прадуктаў у галіне журналістыкі.
Тэматыка навучальных заняткаў Нацыянальнай бібліятэкі Беларусі па фарміраванні інфармацыйнай культуры карыстальнікаў разнастайная: “Пошук навуковай інфармацыі ў сетцы Інтэрнэт”, “Набытыя базы даных”, “Электронныя рэсурсы, створаныя Нацыянальнай бібліятэкай”, “Асновы пошуку: каталогі, бібліяграфія, даведачныя выданні”, “Пошук інфармацыі па электронных і картачных каталогах”, “Рэсурсы і паслугі бібліятэкі: коратка пра галоўнае”, “Афармленне бібліяграфіі да навуковай работы”, “Як скарыстацца рэсурсамі, не выходзячы з дому”.
Заказаць заняткі можна па тэлефоне: (8 017) 293 27 39, e-mail: osio@nlb.by.
Матэрыял пададзены аддзелам даведачна-інфармацыйнага абслугоўвання.
