Зімовыя карункі

Святочная выстава “Зімовыя карункі”, прымеркаваная да Новага года і Каляд, працуе з 8 снежня ў кальцавой галерэі 2-га паверха.

Набліжаецца самая чароўная і казачная пара года. Час марозных узораў на шкле, ахутаных і прыбраных снегам дрэў і дамоў. Час утульных карункавых рэчаў і сумеснага вечаровага чытання вершаваных і празаічных гісторый на тэму зімовых свят. 

Кніжная выстава прадстаўляе шэраг выданняў і выяўленчых дакументаў з фонду Нацыянальнай бібліятэкі Беларусі, што пазнаёмяць з вытокамі калядных свят і дапамогуць прасякнуцца незвычайнай атмасферай зімовых дзён.

Экспазіцыя складаецца з некалькіх раздзелаў і расказвае пра гісторыю народных свят, навагоднія і калядныя традыцыі і звязаныя з імі прыкметы і павер’і. Адкрываюць яе раздзелы “Каляды на Беларусі” і “Каляды ў свеце”, у якіх асаблівая ўвага нададзена традыцыям святкавання Новага года і Каляд нашымі продкамі, а таксама асаблівасцям святкавання ў іншых краінах.

Цэнтральнае месца адведзена раздзелу "Майстэрня Дзеда Мароза", з якога можна даведацца, як упрыгожыць кватэру, арыгінальна аформіць падарункі родным і блізкім, змайстраваць маскі, сувеніры і ёлачныя ўпрыгожанні. Парады прафесійных дэкаратараў і сцэнарыстаў дапамогуць стылёва сервіраваць стол і арганізаваць незабыўнае, поўнае весялосці, сюрпрызаў і конкурсаў свята.

Здаўна існавала традыцыя дарыць дзецям у пачатку года кнігі, якія прывіваюць любоў да прыроды, ведаў, вучаць сяброўству і павазе да дарослых, дапамагаюць бавіць разам сямейныя вечары. Гэтаму прысвечаны асобныя раздзелы “Калядныя чытанні” і “Снежныя старонкі зімовых казак”, у якіх прадстаўлены казачныя аповесці і апавяданні Х.К. Андэрсана, М. Гогаля, М. Някрасава, А. Чэхава, А. Астроўскага, Я. Коласа, С. Маршака і інш. У шматлікіх зборніках-чытанках, хрэстаматыях адмыслова сабраны лепшыя вершы, казкі, апавяданні вядомых пісьменнікаў пра зіму і Новы год. Цёплыя маляўнічыя ілюстрацыі беларускай мастачкі Рыты Цімохавай паўстаюць са старонак зборніка “Падарунак ад Дзеда Мароза”.

Сярод адметнасцей выставы – зімнія нумары аднаго з першых літаратурных часопісаў для дзяцей “Игрушечка” (ХІХ ст.), шэраг кніг-календароў “Круглый год” і “Детский календарь”. Гэтыя штогадовыя дзіцячыя літаратурна-мастацкія зборнікі былі жаданымі навагоднімі падарункамі для савецкіх дзяцей. Кнігі аздоблены мноствам малюнкаў і поўнафарматных каляровых уклеек. У іх друкаваліся вершы, казкі і апавяданні, чарцяжы самаробак і апісанне настольных гульняў, нарысы аб знамянальных датах, падзеях і выбітных людзях.

Запрашаем наведаць выставу і далучыцца да святочнага кніжнага чытання, каб пачаць Новы год з добрымі кнігамі.

Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.

Прадстаўленыя ў экспазіцыі кнігі можна заказаць праз электронны каталог Нацыянальнай бібліятэкі Беларусі.

Тэлефон для даведак: (8 017) 293 29 80.