З 26 па 28 верасня дырэктар Нацыянальнай бібліятэкі Беларусі Раман Матульскі прыняў удзел у VII Міжнародным навукова-практычным семінары “Абліччы памяці. Найноўшыя тэхналогіі захавання і аднаўлення рукапіснай і друкаванай спадчыны" ў Ерэване.

У рамках семінара Раман Матульскі выступіў з дакладам “Дзейнасць Нацыянальнай бібліятэкі Беларусі па захаванні гісторыка-культурнай спадчыны” і прыняў удзел у цырымоніі дарэння шматтомнага факсімільнага выдання “Кніжная спадчына Францыска Скарыны” навукова-даследчаму Інстытуту старажытных рукапісаў імя Месропа Маштоца “Матэнадаран”, які выступіў ініцыятарам і арганізатарам мерапрыемства. Рэстаўратары, супрацоўнікі бібліятэк і музеяў, архівісты, спецыялісты ў галіне найноўшых тэхналогій абмяняліся вопытам і ведамі, пазнаёміўшыся з найбагацейшымі і ўнікальнымі рукапісамі і друкаваным зборам “Матэнадарана”.

Акрамя таго, 25 верасня Раман Матульскі прэзентаваў у Нацыянальнай бібліятэцы Арменіі міжнародны навуковы і даследчы праект “Кніжная спадчына Францыска Скарыны” і перадаў у дар 21-томнае факсімільнае выданне.

Агульнанацыянальны праект па факсімільным перавыданні кніжнай спадчыны Францыска Скарыны ажыццяўляўся з 2013 года на працягу пяці гадоў. Асноўнымі выканаўцамі выступілі Нацыянальная бібліятэка Беларусі і Банк “БелВЭБ”. Дзякуючы сумесным намаганням і цесным партнёрскім стасункам падчас святкавання 500-годдзя беларускага кнігадрукавання кніжная спадчына Францыска Скарыны паўстала ў адзінай калекцыі факсімільных выданняў і стала стрыжнем святочных мерапрыемстваў, якія прайшлі ва ўсім свеце.

Нацыянальнай бібліятэцы Арменіі таксама быў перададзены камплект кніг у рамках праекта “Беларусь сёння”, які рэалізуецца Нацыянальнай бібліятэкай Беларусі з 2010 года. Фонды Нацыянальнай бібліятэкі Арменіі папоўнілі беларускія выданні, якія адлюстроўваюць сацыяльна-эканамічнае і палітычнае жыццё краіны, яе шматвяковую гісторыю і культуру, выданні – лаўрэаты нацыянальнага конкурсу “Мастацтва кнігі” і іншых прэстыжных прэмій, лепшыя літаратурна-мастацкія, навуковыя, навукова-папулярныя выданні, энцыклапедыі , даведнікі і фотаальбомы.