З 3 лютага па 2 сакавіка ў аддзеле абслугоўвання афіцыйнымі дакументамі (2-гі паверх, пам. 207) арганізавана тэматычная кніжная выстаўка “Лес: рацыянальнае выкарыстанне, захаванне і ўстойлівае развіццё”, прысвечаная Міжнароднаму году лясоў.
2011 год быў абвешчаны Міжнародным годам лясоў на восемдзесят трэцім пленарным пасяджэнні Генеральнай Асамблеі ААН 20 снежня 2006 г. (рэзалюцыя 61/193). Год лясоў афіцыйна адкрыецца на дзявятай сесіі Ляснога форуму ААН, якая праходзіць у Нью-Ёрку з 24 студзеня па 4 лютага 2011 г.
Асноўная задача Міжнароднага года лясоў – павышэнне дасведчанасці жыхароў нашай планеты пра значнасць лясных экасістэм, іх ахову, узнаўленне і аднаўленне.
Лясы пакрываюць 31 % паверхні сушы. Яны – лёгкія нашай планеты. 13 % сусветных лясоў адносяцца да ахоўваемых прыродных тэрыторый. Лясы адыгрываюць выключна важную ролю ў захаванні біялагічнай разнастайнасці – гэта асяродак рассялення прыкладна 3/4 усіх відаў раслін, жывёл і грыбоў, якія існуюць на нашай планеце. Лясы з’яўляюцца часткай культурна-гістарычнага асяроддзя, пад уздзеяннем якога фарміруюцца культура і звычаі цэлых народаў, і таксама служаць крыніцай працы і матэрыяльнага дабрабыту значнай часткі насельніцтва планеты.
Плошча лясоў на нашай планеце даўно і няўхільна скарачаецца. Штодня на Зямлі губляецца каля 350 квадратных кіламетраў лясоў з-за пашырэння сельскагаспадарчых угоддзяў, будаўніцтва новых паселішчаў, экалагічна непрымальных практык лесакарыстання. Лясы гінуць ад уздзеяння пажараў, насякомых-шкоднікаў, хвароб, неспрыяльных умоў надвор’я і іншых прычын.
Памяншэнне плошчы лясных масіваў вядзе да негатыўных працэсаў, якія маюць глабальнае значэнне: эрозіі глеб, скарачэння разнастайнасці расліннага і жывёльнага свету, дэградацыі водных басейнаў, павелічэння ўтрымання вуглякіслага газу ў атмасферы, паніжэння колькасці прамысловай і паліўнай драўніны, а ў канчатковым выніку – да памяншэння патэнцыялу жыццядзейнасці чалавецтва.
Працэсы скарачэння плошчаў лясоў і іх дэградацыі сталі міжнароднымі праблемамі, якія патрабуюць сумеснага рашэння ўсімі краінамі свету, таму абвешчаны ААН Міжнародны год лясоў яшчэ раз дазволіць прыцягнуць увагу сусветнай грамадскасці да праблем рацыянальнага выкарыстання, захавання і ўстойлівага развіцця ўсіх відаў лясоў у інтарэсах сённяшняга і будучых пакаленняў.
У Рэспубліцы Беларусь ужо распрацаваны план мерапрыемстваў па правядзенні ў 2011 г. Міжнароднага года лясоў. Рэалізацыя гэтага плана будзе спрыяць захаванню і прымнажэнню лясных багаццяў нашага краю. Беларусь – лясная краіна. Больш за 38 % яе тэрыторыі пакрыта лесам. Агульная плошча ляснога фонду складае 9,4 млн гектараў. Усе лясы ў Беларусі з’яўляюцца выключнай уласнасцю дзяржавы. У выніку мэтанакіраванай палітыкі лесааднаўлення і лесаразвядзення павялічваецца плошча пакрытых лесам земляў, захавана фармацыйная структура і відавая разнастайнасць лясоў, павышаецца іх устойлівасць і прадуктыўнасць.
На выстаўцы прадстаўлена каля 100 дакументаў на рускай, англійскай і нямецкай мовах. Вялікую частку экспазіцыі складаюць дакументы міжнародных арганізацый: кнігі, брашуры, мімеаграфаваныя матэрыялы ААН, перыядычныя выданні, буклеты.
Экспазіцыя ўключае наступныя тэматычныя раздзелы:
- Лясы і ўстойлівае развіццё;
- Міжнародныя прававыя дакументы па захаванні і рацыянальным выкарыстанні лясных рэсурсаў;
- Міжнароднае і рэгіянальнае супрацоўніцтва і ўзаемадзеянне ў галіне захавання ўсіх відаў лясоў;
- Лясы і іх ахова ў Рэспубліцы Беларусь.
Выстаўка будзе цікавая спецыялістам у галіне лясной гаспадаркі, прыродакарыстання і аховы навакольнага асяроддзя, навуковым работнікам, аспірантам, студэнтам, а таксама ўсім тым, хто цікавіцца праблемай захавання лясоў і біялагічнай разнастайнасці нашай планеты.
Карысныя спасылкі
United Nations Forum on Forests (UNFF)
International Year of Forests, 2011
United Nations Forum on Forests (UNFF) Documents
Міністэрства лясной гаспадаркі Рэспублікі Беларусь
У Нацыянальнай бібліятэцы Беларусі да Міжнароднага года лясоў арганізаваны фестываль пейзажа.
 |
 |
 |
||||||
 |
 |
 |
