З 15 верасня па 8 лістапада ў зале беларускай літаратуры (пам. 205) арганізавана выстаўка “Маё багацце ўсё – у слове”, прымеркаваная да 80-годдзя народнага паэта Беларусі Ніла Гілевіча.
Ніл Сымонавіч Гілевіч – адзін з выдатных майстроў сучаснай беларускай літаратуры. літаратуразнавец, фалькларыст, перакладчык, заслужаны дзеяч навукі Беларусі, лаўрэат Дзяржаўнай прэміі Беларусі імя Я. Купалы (1980) і Міжнароднай прэміі імя Х. Боцева (1986).
Яго творчасць добра вядома шырокай грамадскасці рэспублікі і далёка за яе межамі. Прырода шчодра надзяліла пісьменніка шматгранным талентам: паэт-лірык, сатырык і публіцыст, драматург, палымяны прамоўца, трыбун, грамадскі дзеяч, асветнік, вучоны, фалькларыст, перакладчык.
Паэзія Н. Гілевіча спалучае ў сабе незабыўную памяць вайны з роздумам пра час і жыццё, паглыблены маральны пошук з актыўнай пропаведдзю дабра і справядлівасці, вялікай любові да свайго народа і роднай культуры.
Літаратурная спадчына Ніла Гілевіча прадстаўлена на выстаўцы зборамі твораў, выбранымі творамі паэта, асобнымі кнігамі паэзіі, зборнікамі сатыры і гумару, творамі для дзяцей, кнігамі літаратурна-крытычных і публіцысты-чных артыкулаў, работамі па літаратуразнаўстве і фалькларыстыцы, зборнікам п’ес, аўтабіяграфічнай аповесцю, а таксама публікацыямі, змешчанымі ў розных калектыўных выданнях і часопісах.
У асобным раздзеле экспазіцыі дэманструюцца пераклады, зробленыя пісьменнікам з балгарскай, славенскай, рускай, украінскай, польскай, сербахарвацкай, лужыцкай і іншых моў.
Выстаўка пазнаёміць з творамі Н. Гілевіча ў перакладах на розныя мовы свету, а таксама з яго ўкладальніцкай і рэдактарскай дзейнасцю.
Дапаўняюць экспазіцыю матэрыялы пра жыццёвы і творчы шлях юбіляра.
Кантактны тэлефон: 293-27-16.
 |
 |
 |
 |
 |
 |
 |
 |
 |
