16 сакавіка ў бібліятэцы прайшла прэзентацыя кнігі “Хатынь. Трагедыя беларускага народа”.
Кніга, прысвечаная 75-годдзю трагедыі Хатыні, пабачыла свет у выдавецтве “Беларуская Энцыклапедыя імя Петруся Броўкі”. Яе аўтар Артур Зельскі, дырэктар мемарыяльнага комплексу “Хатынь”, сабраў дадзеныя пра вёску пачынаючы з XVI стагоддзя і заканчваючы апошнім трагічным днём – 22 сакавіка 1943 года.
У выданні таксама прыведзены звесткі пра іншыя населеныя пункты, знішчаныя ў гады акупацыі, сімвалам трагедыі якіх стаў мемарыяльны комплекс “Хатынь”. Драматычны лёс Хатыні падзялілі яшчэ 618 беларускіх вёсак, частка з якіх з часам была адноўлена.
Дырэктар выдавецтва “Беларуская Энцыклапедыя імя Петруся Броўкі” Уладзімір Андрыевіч і аўтар кнігі Артур Зельскі перадалі ў фонд Нацыянальнай бібліятэкі Беларусі адзін з экзэмпляраў выдання.
Дырэктар Нацыянальнай бібліятэкі Беларусі Раман Матульскі выказаў падзяку аўтару, выдавецтву і ўсім, хто мае дачыненне да выхаду ў свет такога важнага і каштоўнага для захавання народнай памяці выдання. У сваім выступе ён таксама адзначыў: “Часта на прэзентацыях кніг даводзіцца чуць, што аўтар абагульніў папярэднія матэрыялы і закрыў тэму. Дык вось, Хатынь – гэта не закрытая тэма. Хатынь – гэта сімвал трагедыі не толькі беларускага народа, але і ўсяго чалавецтва, гэта трывожны напамін пра каштоўнасць міру і спакою для тых, хто жыве зараз, і для будучых пакаленняў”.
У мерапрыемстве таксама ўзялі ўдзел загадчык аддзела ваеннай гісторыі і міждзяржаўных адносін Інстытута гісторыі НАН Беларусі Аляксей Літвін і начальнік аддзела ідэалагічнай работы, культуры і па справах моладзі Лагойскага раённага выканаўчага камітэта Яўгенія Паляшчук.
Нацыянальная бібліятэка Беларусі прадставіла ўвазе гасцей выстаўку-прагляд выданняў, прысвечаных трагічнай гісторыі Хатыні. Эмацыйную афарбоўку мерапрыемству надалі музычныя нумары ў выкананні навучэнцаў Мінскага дзяржаўнага каледжа мастацтваў.