12 красавіка ў Віцебскім дзяржаўным тэхналагічным універсітэце (ВДТУ) адбыўся семінар, прысвечаны электронным інфармацыйным рэсурсам для навукі і адукацыі.
Семінар быў арганізаваны Саветам бібліятэк Беларусі па інфармацыйным узаемадзеянні, Нацыянальнай бібліятэкай Беларусі, кампаніяй EBSCO Information Services, ВДТУ.
У сваім дакладзе Вячаслаў Брычкоўскі, загадчык сектара інфармацыйнага забеспячэння інавацыйнай дзейнасці Нацыянальнай бібліятэкі Беларусі (НББ), праінфармаваў прысутных аб магчымасцях віртуальнай чытальнай залы (ВЧЗ НББ) пры арганізацыі інфармацыйнага забеспячэння інавацыйнай дзейнасці ў ВНУ, распавёў аб электронных інфармацыйных рэсурсах, даступных партнёрам ВЧЗ НББ.
Андрэй Сакалоў, дырэктар па рэгіянальным развіцці ў Расіі, Беларусі і Малдове кампаніі EBSCO Information Services, у сваім выступленні падрабязна разгледзеў пытанні, звязаныя з выкарыстаннем шматлікіх баз даных, даступных на платформе EBSCOhost, распавёў аб электронных кнігах і архівах навуковых часопісаў на платформе EBSCOhost .
Падчас трэнінгу, праведзенага Тамілай Міркамалавай, спецыялістам па рабоце з кліентамі EBSCO ў Расіі і краінах СНД, удзельнікі азнаёміліся з магчымасцямі і методыкай эфектыўнага пошуку інфармацыі на платформе EBSCOhost, а таксама атрымалі адказы на пытанні, якія іх цікавілі.
У рабоце семінара прынялі ўдзел звыш 40 прадстаўнікоў Віцебскага ўніверсітэта, сярод якіх выкладчыкі, навуковыя работнікі, аспіранты, магістранты, студэнты і бібліятэкары.