1 сакавіка 2018 г. віртуальная чытальная зала Нацыянальнай бібліятэкі Беларусі працягнула серыю семінараў і прадставіла свае рэсурсы ў Гомелі. Прэзентацыі прайшлі ў Гомельскім дзяржаўным універсітэце імя Францыска Скарыны і Pэспубліканскім навукова-практычным цэнтры радыяцыйнай медыцыны і экалогіі чалавека.
У семінарах прынялі ўдзел больш за 100 слухачоў: прадстаўнікі прафесарска-выкладчыцкага складу, навуковыя супрацоўнікі, аспіранты, магістранты, медыцынскія работнікі.
Прадстаўнік Нацыянальнай бібліятэкі Беларусі Вячаслаў Брычкоўскі пазнаёміў удзельнікаў з перавагай выкарыстання рэсурсаў і сэрвісаў віртуальнай чытальнай залы ў інфармацыйным забеспячэнні навукова-даследчых і адукацыйных працэсаў, а таксама з інавацыйнай мадэллю навуковых камунікацый – рухам Адкрытага доступу да электронных інфармацыйных рэсурсаў.
Ірына Ціханкова (Clаrivate Analytics) прадставіла слухачам магчымасці выкарыстання інфармацыйных прадуктаў на платформе Web of Science, падыходы да стварэння і інтэрпрэтацыі справаздач па публікацыях і цытуемасці арганізацый, навуковых калектываў і аўтараў; практычныя рэкамендацыі па стварэнні і напаўненні профіляў ResearcherID і ORCID, а таксама метады падбору і ацэнкі навуковых часопісаў для размяшчэння публікацый у міжнародных навуковых выданнях.
