21 ліпеня ў дзіцячым аздараўленчым лагеры “Планета”, размешчаным у маляўнічым кутку Мінскага раёна, адбылася выязная віртуальная экскурсія з цыкла “Славутыя імёны Бацькаўшчыны”.
Дзеці з Віцебскай, Мінскай і Магілёўскай абласцей здзейснілі невялікае віртуальнае падарожжа па Нацыянальнай бібліятэцы Беларусі і прайшліся дарогамі жыцця Якуба Коласа.
З вялікім захапленнем дзяўчынкі і хлопчыкі паглядзелі анімацыйны фільм “Аповесць мінулых гадоў” пра гісторыю паходжання гербаў гарадоў Беларусі, прынялі актыўны ўдзел у выкананні творчых заданняў і адказалі на ўсе пытанні віктарыны.
Увазе экскурсантаў быў прадстаўлены кніжны агляд твораў Якуба Коласа і Янкі Маўра розных гадоў, а таксама выданні пра Мінск і Мінскую вобласць з фондаў Нацыянальнай бібліятэкі.
У канцы экскурсіі усіх чакалі памятныя сувеніры.
Заказаць выязную віртуальную экскурсію з цыкла “Славутыя імёны Бацькаўшчыны” па творчасці Янкі Маўра, Янкі Купалы і Якуба Коласа можна па тэлефонах: 293 28 53, 293 29 66.
Запрашаем аздараўленчыя лагеры да супрацоўніцтва!