Выстаўкі 2020 г.
|
Самая медыйная касмічная кніга
На анлайн-выставе прадстаўлена поўная калекцыя старадрукаў “Вялікае мастацтва артылерыі” Казіміра Семяновіча, якая захоўваецца ў фондзе бібліятэкі. На працягу стагоддзяў унікальная манаграфія была адной з найважнейшых і запатрабаваных у Еўропе навуковых прац, фундаментальнай крыніцай для тых, хто стаяў ля вытокаў сучаснага ракетабудавання і вывеў чалавецтва ў космас. Нездарма даследаванне было перакладзена на шматлікія еўрапейскія мовы (французскую, нямецкую, англійскую, польскую і інш.). |
 |
З кніг Уладзіміра Караткевіча
Упершыню на выставе можна будзе ўбачыць кнігі з кабінета і бібліятэкі пісьменніка. Даведацца, якія рукапісы, старадрукі і рэдкія выданні захоўваліся ў яго асабістым кнігазборы. Асноўнае месца ў экспазіцыі нададзена экслібрысам самога Уладзіміра Караткевіча, а таксама Іосіфа Капеляна, Генадзя Грака, Арлена Кашкурэвіча, Міколы Купавы, Уладзіміра Басалыгі і Вячкі Целеша. У экспазіцыі – аўтографы тых, хто ведаў Уладзіміра Караткевіча, і аўтограф самому сабе; кнігі з фондаў Дзяржаўнага музея гісторыі беларускай літаратуры Выстава падрыхтавана сумесна з сям’ёй пляменніцы пісьменніка Алены Іванаўны Сінькевіч. |
|
Тайны канцылярыі На выставе вы ўбачыце першыя алоўкі і асадкі, пер’ячысткі, пясочніцы, чарніліцы і інш., пісьмовыя прылады знакамітых людзей, а таксама змесціва ранца гімназістаў розных эпох (сшыткі, алоўкі, асадкі, тачылкі, закладкі, пеналы...) і інш. Экспазіцыя падрыхтавана ў межах аўтарскага праекта “У пошуках страчанага” і дазваляе праз прадметы калекцыі У. Ліхадзедава адкрыць цэлы свет матэрыяльнай культуры, звязанай з традыцыяй пісьменства. |
|
“Сакрэты” кніжных старонак Памятаеце старую дзіцячую гульню ў “сакрэты”? Гульцы рабілі ў зямлі невялікія сховы, дзе пад шкельцам змяшчалі розныя дробныя “скарбы”, а потым выкрывалі іх і дэманстравалі толькі самым лепшым сябрам. “Сакрэты” іншым разам можна знайсці і ў кнігах. За час вывучэння некаторых выданняў у навукова-даследчым аддзеле кнігазнаўства назбіралася калекцыя адмысловых знаходак. Некаторымі з іх мы з радасцю дзелімся з вамі. |
|
Biełaruskaja łacinka
У экспазіцыі прадстаўлены кніжныя помнікі, створаныя ў лацінскай графіцы на беларускай мове, пачынаючы ад XVII ст. да сучаснасці.
Асобны раздзел выставы распавядае гісторыю развіцця лацінскага алфавіта і прадстаўляе буквары, чытанкі і граматыкі беларускай мовы Каруся Каганца, Рудольфа Абіхта, Янкі Станкевіча, Вацлава Ластоўскага, Браніслава Тарашкевіча і інш. |
|
Правобраз еўрапейскай Канстытуцыі Выстава рарытэтаў з Беларусі і Латвіі, прымеркаваная да Дня Канстытуцыі. Упершыню шырокай публіцы прадстаўлены амаль нікому не вядомы спіс Статута ВКЛ 1588 г. у перакладзе на нямецкую мову пачатку ХVIІІ ст. са збору адной са старэйшых бібліятэк Еўропы – Акадэмічнай бібліятэкі Латвійскага ўніверсітэта. Таксама на выставе можна пабачыць друкаваныя асобнікі Статута XVIІ–XIX стст. з фонду Нацыянальнай бібліятэкі Беларусі на іншых еўрапейскіх мовах, якія сведчаць пра шырокі ўплыў беларускай прававой культуры на фарміраванне міжнароднага канстытуцыйнага заканадаўства. |
 |
Руплівец бібліятэчнай справы
Выстава прысвечана 135-годдзю з дня нараджэння Яўгена Хлябцэвіча. пабудавана на арыгінальных матэрыялах і дакументах з асабістага архіва Яўгена Хлябцэвіча, які захоўваецца ў фондах Нацыянальнай бібліятэкі Беларусі. Дэманструюцца ўнікальныя фотаздымкі, рукапісы, асабістыя (сямейныя) і творчыя дакументы, а таксама літаратуразнаўчыя і бібліятэказнаўчыя працы і публікацыі розных гадоў. |
|
Маладнякоўскімі крокамі
На выставе можна пазнаёміцца з асобнікамі легендарнага часопіса творчай моладзі 20–30-х гг. ХХ ст. – “Маладняк” (з першага нумара 1923 г. па апошні 1932 г.). Менавіта на старонках № 6 за 1925 г. можна прачытаць праграмны тэкст “«Маладняк» (Замест дэклярацыі)" літаратараў першага прафесійнага згуртавання. Прадстаўлены дакументальныя зборнікі аб дзейнасці пісьменнікаў аб’яднання (бюлетэні з’ездаў), альманахі і перыядычныя выданні рэспубліканскіх філій (“Уздым”, “Маладняк Барысаўшчыны”, “Наддзьвіньне”, “Аршанскі Маладняк” і інш.), а таксама зборнікі творцаў з адметнай серыі “Кніжніца «Маладняк»”. |
